د طالبانو سترې محکمې خبر ورکړی، چې د پکتیکا ولایت په یحيی خېلو ولسوالۍ کې د یادې ډلې ابتدایه محکمې د پرېکړې له مخې یو کس د «غلا» په تور په عام محضر کې په درو وهل شوی دی. د یادې محکمې په خبرپاڼه کې راغلي، چې دغه کس ته د ۲۵ درو سربېره د یو کلن بند سزا هم ورکړل شوې ده.
د طالبانو د ټولګټو چارو وزارت خبر ورکړی، چې د روان ۱۴۰۴لمریز کال د تلې په میاشت کې د افغانستان د اوسپنې پټلۍ له لارې ۴۹۳زره او ۵۰۶ مټریک ټنه انتقالات شوي دي. د دغه وزارت په خبرپاڼه کې راغلي، د دغه انتقالاتو ۹۷۱ ټنه یې صادرات و چې ډېره برخه یې وچه مېوه او د انارو جوس جوړوي.
په بدخشان ولایت کې د طالبانو د امنیې قوماندانۍ ویاند احسانالله کامګار خبر ورکړی، چې د دغه ولایت په ارغنجخواه ولسوالۍ کې د یوې ټرافیکي پېښې له امله یو کس مړ او ٦ نور ټپیان شوي دي. هغه ویلي، چې ټپیان د درملنې لپاره د فیضاباد روغتون ته لېږدول شوي دي.
د کندهار ولایت له مرکزي زندانه د ښځو په ګډون ٢٤٨ بندیان خوشې شوي او د ٤٢٩نورو د بند موده کمه شوه. دارنګه د سمنګان له مرکزي زندانه هم ۴۷ بندیان خوشې شوي او د ۱۷ نورو د بند موده کمه شوې ده.
د ایران د بهرنیو چارو وزارت مرستیال کاظم غریب ابادي ویلي، چې طالبانو له افغانستان نه ایران ته د ایراني بنديانو د لېږد هوکړه کړې ده. هغه ویلي، چې د دواړه خواوو د هوکړې له مخې د دغو بندیانو نوملړ به ډېر ژر د ایران سفارت ته وسپارل شي او ژر تر ژره به یې د لېږد زمینه برابره شي.
د طالبانو د کورنیو چارو وزارت وايي، که پاکستان پر افغانستان برید وکړي، دوی به ورته «پرېکنده او سخت ځواب» ورکړي، داسې ځواب چې «پاکستان ته به درس او نورو ته عبرت» وي.
د طالبانو د امربالمعروف او نهې عن المنکر وزارت مسوولین وايي، د خپل مشر هبتالله اخوندزاده له حکم سره سم یې تراوسه ۳۵۸۰ رواني ناروغان او لېونیان راټول او د درملنې او ساتنې په موخه یې سرې میاشتې ریاستونو ته سپارلي دي.
د پاکستان د اطلاعاتو فدرالي وزیر عطاالله تارړ ویلي، پاکستان څو ځلې له طالبانو سره د سرحدي بریدونو او د هند له ملاتړ برخمنو ډلو «ټيټيپي او بياېلاې» په اړه خبرې کړي، خو دوی لا هم د دې ډلو ملاتړ کوي.
د طالبانو له پېښو سره د مبارزې چمتووالي ملي ادارې ريیس نورالدین ترابي د کډوالۍ نړۍوال سازمان له رييسې میاپارک او د ځینو نورو موسسو له استازو سره په کتنه کې وویل، موسسې باید پر یوه ولایت تمرکز ونهلري، بلکې د هېواد ۳۴ ولایتونو ته خپلې مرستې ورسوي.
د طالبانو د سرحدونو، قومونو او قبایلو چارو وزارت سرپرست او د سرحدي کمېسیون مشر نورالله نوري د ایران د بهرنیو چارو وزارت له مرستیال کاظم غریبابادي سره د دواړو هېوادونو ترمنځ د ښې همغږۍ، له قاچاق څخه د مخنیوي او د سرحدي نښو نښانو د نوي کولو په اړه په کابل کې غونډه وکړه.
په افغانستان کې د ملګرو ملتونو مرستندویه ماموریت (یوناما) په خپل تازه راپور کې ویلي، چې پر طالبانو د کورنیو او نړۍوالو نیوکو سربېره لا هم یاده ډله د افغان مېرمنو پر ضد د تبعیض او محدودیتونو لړۍ ته دوام ورکوي.
د مخکېني جمهوري نظام پرمهال د بهرنیو چارو پخواني وزیر محمد حنیف اتمر په ترکیه کې د طالبانو او پاکستان تر منځ خبرو ته په اشارې سره وايي، طالبان اوس باید پر دې پوه شوي وي، چې د پاکستان پر نظامیانو تکیه کول لویه تېروتنه او فاجعه وه.
د افغانستان د پخواني ولسمشر محمد اشرف غني رسمي فېسبوک پاڼه له تېرې ورځې راهیسې تړل شوې ده.