د راپورونو پر بنسټ پاکستان پرېکړه کړې، چې په خېبر پښتونخوا، بلوچستان او پنجاب ایالتونو کې د افغان کډوالو ۱۶ پنډغالي وتړی. د پاکستان مرکزي حکومت په امر ټولو ایالتونو کې د سپټمبر له لومړۍ نېټې راهیسې د ملګرو ملتونو سره د ثبت شویو افغان کډوالو د اېستل کیدو لړۍ هم پیل شوې ده.
د کډوالو په چارو کې د ملګرو ملتونو عالي کمېشنرۍ «یو اېن اېچ سي ار» اعلان کړی چې روان ۲۰۲۵ کال له پیل راهیسې څه باندې ۲.۸ مېلونه افغان کډوال له ایران او پاکستان څخه افغانستان ته ستانه شوي دي.
په داسې حال کې چې په پاکستان کې مېشت افغان کورنۍ د نیول کېدو او شړلو له وېرې له سختو ستونزو سره مخ دي، د پښتون ژغورنې غورځنګ مشر منظور احمد پښتین وايي، پښتانه ځوانان باید د افغانانو د جبري ایستلو پر ضد پرلپسې هڅې وکړي.
د پاکستان حکومت اعلان کړی چې د افغان کډوالو د بېرته ستنېدو د تګلارې په لړ کې یې په خېبر پښتونخوا کې د افغان کډوالو پنځه پنډغالي تړلي دي.
له پاکستان او ایرانه د میلیونونو افغان کډوالو جبري ستنول چې له سختو فشارونو سره مخ دي، د داعش-خراسان ډلې د فعالیتونو د پیاوړتیا اندېښنې زیاتې کړې دي. د ډېپلوماټیکو او امنیتي سرچینو په وینا، دا بهیر د سیمې لپاره جدي امنیتي ننګونې رامنځته کولای شي.
ننګرهار کې د طالبانو رسنیز دفتر خبر ورکړی، چې په دې وروستیو کې له پاکستان نه د افغان کډوالو د اېستلو بهیر ګړندی شوی او هره ورځ شاوخوا زر کورنۍ راستنېږي. د طالبانو ځايي والي، ملا نعیم اخوند په تورخم کې د دغه ستنېدونکو ستونزې او اړتیاوې هم اورېدلې دي.
د طالبانو تر واک لاندې باختر اژانس خبر ورکړی، چې له پاکستان او ایران نه د افغان کډوالو د اېستلو په بهیر کې تېره ورځ چهارشنبه د (تلې ۲مه) ۱۴۹۴ کورنۍ افغانستان ته ستنې کړای شوې دي. دوی وایي، له دې ډلې ۱۲۰۴ کورنۍ د تورخم، سپین بولدک او بهرامچې له لارې له پاکستان نه ستنې شوې دي.
د پاکستان د بشري حقونو کمېسیون د یوې اعلامیې په خپرولو سره له هغو راپورونو ژوره اندېښنه څرګنده کړې، چې ګڼ شمېر افغان کډوال ناروغان د پولیسو له خوا د نیول کېدو له وېرې روغتونونو ته نه ورځي. راپورونه ښيي، ان یو شمېر روغتونونو د هغو افغانانو درملنه نه ده منلې چې ویزې نه لري.
د پاکستان دفاع وزیر خواجه اصف ادعا کړې، چې پاکستان د افغان کډوالو د حضور له کبله له بېلابېلو ستونزو سره مخامخ دی. نوموړي په ټینګار سره ویلي، چې ټول افغان کډوال باید بېرته افغانستان ته ستانه شي.
پاکستاني رسنیو خبر ورکړی، چې تر ۵۰ ډېر هغه افغانان چې په دغه هېواد کې یې د اوسېدو قانوني اسناد نه لرل؛ په جبري توګه افغانستان ته ستانه کړای شوي دي. له دې ډلې ۲۱ کسان نارینه، ۸ مېرمنې او ۲۰ ماشومان وو.
د بلوچستان سترې محکمې هغه عریضه منلې، چې پهکې تر راتلونکو شپږو میاشتو د افغان کډوالو د نه ستنولو غوښتنه شوې ده. په عریضه کې راغلي، دا مهال زرګونه افغان ماشومان او ځوانان د بلوچستان په ښوونیزو ادارو کې پر زدهکړو بوخت دي چې بېرته ستنول به یې د زدهکړو روان بهیر ګډوډ کړي.
د طالبانو تر کنټرول لاندې د کډوالو ستونزو ته د رسېدنې کمېسیون خبر ورکړی، چې تېره ورځ له ایران او پاکستان نه ۷۷۷۲ کډوال په جبري توګه افغانستان ته ستانه کړای شوي دي.
د روان کال له پیل راهیسې نږدې ۳ میلیونه افغانان هېواد ته راستانه شوي، چې دا د نړۍ تر ټولو ستره سرحدي کډوالي بلل کېږي. د دې پراخ بهیر له امله د هېواد نفوس یوازې په ۹ میاشتو کې ۶.۵سلنه زیات شوی. هره ورځ د ۱۰ تر ۱۵ زره کسانو راستنېدنه د افغانستان پر محدودو سرچینو دروند فشار راولي.