د طالبانو د حکومت اقتصادي مرستیال ملا عبدالغني برادر اخوند اعلان کړی چې په فراه ولایت کې به د بخش اباد خاکي بند عملي کار ژر پیل شي. نوموړي ویلي، دغه پروژه به د سیمې د اوبو کمښت، برېښنا او کرنیزو اړتیاوو د حل لپاره مهم ګام وي.
د طالبانو د هرات ولایت مقام رسنیز دفتر وايي په دغه ولایت کې د څه دپاسه ۶۰ میلیونه ډالرو په پانګونې سره ۱۰ نوې تولیدي فابریکې پرانېستل شوې. یاده اداره وايي، د طالبانو له بیا ځلي واک ته رسېدو سره د هرات صنعتي ښار کې د فعالو فابریکو شمېر له ۱۲۰ څخه تر ۱۱۷۰ پورې لوړ شوی دی.
د روان زېږدیز کال په اګست میاشت کې د پاکستان او افغانستان ترمنځ د ۱۴۳ مېلیون ډالرو په ارزښت راکړه ورکړه شوې ده. د راپورونو له مخې؛ په دې لړ کې پاکستان ته د افغانستان په صادراتو کې د پام وړ زیاتوالی راغلی دی.
د طالبانو د اوبو او انرژۍ وزیر عبداللطیف منصور وایي، چې پرون (د وږي ۳۰مه) یې د بنګله دېش له علماوو او پانګهوالو سره لیدلي دي. نوموړي پر اېکس پاڼه کاږلي، چې په دغه لیدنه کې پانګهوالو ورسره د څو اړخیزو همکاریو ژمنه کړې ده.
د طالبانو مالیې وزارت خبر ورکړی، چې په روان کال کې له افغانستان نه د صادراتو او ټرانزيټ کچه د پام وړ ډېره شوې ده. د تېرکال پرتله صادرات ۱۳. ۵ سلنه او دغه ډول بهرنی ټرانزیټ هم ۲۴. ۵ سلنه ډېر شوی دی.
د ایران د سويلي خراسان والي سید محمدرضا هاشمي ویلي، چې ایران له افغانستان سره پر پوله درې ګډ بازارونه لري او تېر کال یې افغانستان ته د شاوخوا یو میلیارډ او ۷۵۰ مېليونه ډالرو په ارزښت صادرات لاره.
د طالبانو د صنعت او سوداګرۍ وزیر نورالدین عزیزي له خپل ایراني سیال سیدمحمد اتابک او مل پلاوي سره یې د کتنې پرمهال ویلي، چې د کابل او تهران ترمنځ کلنۍ سوداګریزه کچه باید تر ۱۰ مېلیارد ډالرو ورسېږي.
د صنعت او تولید په برخه کې د پاکستان د لومړي وزیر مرستیال هارون اختر په ازبکستان کې د دغه هېواد له لومړي وزیرعبدالله عارفوف سره په لیدنه کې ټینګار کړی، چې پاکستان د ټرانس-افغان رېل پټلۍ پر وخت پیل ته ژمن دی او غواړي د دواړو هېوادونو اقتصادي او بانکي اړیکې پراخې شي.
د کندهار ولایت لپاره د طالبانو برېښنا ریاست د برېښنا د دوامداره پرچاویو په تړاو له پرلهپسې شکایتونو وروسته ویلي، اوسمهال په کجکي بند کې د اوبو سطحه ډېره ټیټه شوې او نور نه شي کولای چې کندهار ښار ته د اړتیا وړ برېښنا برابره کړي.
د طالبانو د ټولګټو چارو وزارت خبر ورکړی، چې په تېره یوه اوونۍ کې د دغه وزارت د اوسپنې پټلۍ له لارې ۹۱۳۷۳ مټریک ټنه انتقالات شوي دي. د دغه انتقالاتو یوه برخه وچه مېوه او د مسو صادرات جوړوي.
د طالبانو د صنعت او سوداګرۍ وزارت خبر ورکړی، چې یو لوړپوړی ایرانی پلاوی د کابل او تهران ترمنځ د سوداګرۍ د پراختیا، د ټرانزیټ په برخه کې د اسانتیاوو د رامنځته کېدو او د ګډو پانګونو د ودې په موخه د خبرو لپاره کابل ته رسېدلی دی.
د طالبانو د کانونو او پټرولیم وزارت د پالیسۍ او پروګرامونو معین عبدالرحمان قانت د ایران د اوسپنې او ډبرو ټولنې له مشر مهرداد اکبریان او د ایران سفارت له استازي حسین روستايي سره لیدلي. په دغه لیدنه کې ایراني پلاوي ویلي، چې خصوصي سکټور یې د افغانستان پر کانونو پانګونې ته لېواله دی.
د طـالبانو او ازبکستاني چارواکو ترمنځ په جوزجان کې د توتي میدان د ګازو سروې او را ایستلو پروژه پرانېستل شوه. طالبانو د دې ګاز د سروې او استخراج تړون له ازبکستان سره کړی دی.