د طالبانو تر واک لاندې د دولتي شرکتونو ریاست اړوند د ارزاقو دولتي شرکت وایي چې خپلې ځنځیري مغازې بېرته پرانېزي. یاد شرکت ددې چارې هدف د خپلو عوایدو لوړول او خلکو ته اسانتیا را منځته کول بللي.
د ارزاقو یا خوراکي توکو دولتي شرکت، له څو لسیزو را په دې خوا، په دوو بنسټیزو او غیر بنسټیزو برخو کې خدمتونه وړاندې کول چې په هېواد کې د کورنیو جګړو پر مهال یې ځنځیري پلورنځي چور او تالان شول، او له همغه وخته یې خپل دا خدمات تړلي وو.
د دغه شرکت طالب مسوولان وايي، په راتلونکي کال کې پلان لري، چې د بنسټیزو خدمتونو ترڅنګ، د خلکو په غوښتنه د اړوندو مغازو په بیافعالولو سره، سوداګریزې پراختیا ته هم ځانګړې پاملرنه وکړي.
د دغه شرکت د سوداګریزو چارو د پراختیا مشر اسدالله ابراهیمي وایي، چې د خرڅلاو مغازو بیا فعالول یو ستراتیژیک اقتصادي ګام دی، چې له دې لارې به خلک ارزانه او با کیفیته خوراکي توکو ته په اسانۍ لاسرسی پیدا کړای شي.