برازیل د ملګرو ملتونو د اقلیمي بدلون دېرشم کنفرانس (COP30) پيل کړ او هیله لري، چې د تودوخې پر ضد د مبارزې لپاره د نړۍوالې ټولنې اراده لا هم څرګنده پاتې شي. دا په داسې حال کې ده، چې روان کال له اقتصادي ناورینونو او د امریکا لهخوا د اقلیمي ژمنو د لغوه کېدو سره مل و.
د رويټرز خبري اژانس د دوشنبې په ورځ (د لړم ۱۲مه) په خپل یوه راپور کې ليکلي، چې د سایو پایولو سوداګریز مشران په دې هڅه کې دي، چې حکومتونه د انرژۍ د انتقال په برخه کې د مالي ملاتړ لپاره قوي سياستونه عملي کړي. دوی په يوه لیک کې له حکومتونو غوښتي، چې ژر تر ژره د فوسیلي سون توکو پر ځای د نوي کېدونکو انرژیو د کارونې هڅونې وړاندې کړي.
ماریا منډلوس د «موږ سوداګرۍ ته ارزښت ورکوو» د اېتلاف اجراییوي مشرې چې دغه لیک یې د ۳۵ ډلو له خوا چې د ۱۰۰ زره شرکتونو استازیتوب کوي، همغږی کړی و، وویل: «دا د سوداګریزو ډلو له خوا یوه پېژندنه ده چې څو اړخیزې او د هیلو لوړولو اهمیت درک کوي.»
دا په داسې حال کې ده چې په ریو دي ژانیرو کې ښاروالان، واليان او نور سیمهییز چارواکي به د سیمهییزو مشرانو په غونډه کې ګډون وکړي، خو د تېرې اوونۍ د خونړۍ پېښې پر ضد اعتراضونه کېدای شي په دې غونډه ناوړه اغېزه وکړي.