د ازادۍ جبهې په نوم د طالبانو وسله والې مخالفې ډلې د ملګرو ملتونو د بشري حقونو شورا له هغه نوي پرېکړه لیک څخه هرکلی وکړ، چې لهمخې به یې په افغانستان کې د بشري حقونو اړوند سرغړونو او نړۍوالو جرمونو په تړاو د اسنادو راټولولو لپاره یو خپلواک څېړنیز میکانیزم جوړ شي.
ازادۍ جبهې د یوه بل کال لپاره د افغانستان لپاره د بشري حقونو په چارو کې د ځانګړي راپور ورکوونکي ریچارد بېنېټ د ماموریت له غځېدو هم هرکلی کړی او یاد میکانیزم یې د طالبانو تر ولکې لاندې افغانستان کې د عدالت ټينګښت او د بشري حقونو د سرغړونو پر وړاندې ځواب ورکړې ته د طالبانو د اړ کولو په برخو کې یو مهم او اړین ګام بللی دی.
دغې جبهې د دوشنبې په ماښام (د تلې ۱۴مه) د یوې اعلامیې په خپرولو سره ژمنه کړې، چې د مستندو اطلاعاتو، معتبرو اسنادو او شننو له لارو به له دغه نوي میکانیزم سره هر اړخیزه همکاري ولري.
ازادۍ جبهه وايي، په افغانستان کې د خلکو د بنسټيزو حقونو ساتنه او د عدالت ټينګښټ یو سیاسي انتخاب نه، بلکې یو اخلاقي او حقوقي مسوولیت دی او همداراز یې په ډاګه کړې، چې دغه میکانیزم باید د افغانستان د راتلونکې قضايي بنسټونو مُکَمِل وي نه د هغوی ځای ناستی.
د طالبانو یادې وسله والې جبهې له نړۍوالو غوښتي، چې له دغه میکانیزم څخه په سیاسي، مالي او تخنیکي برخو کې بشپړ ملاتړ وکړي او په وینا یې، په افغانستان نه یوازې دا چې عدالت تر پښو لاندې شوی، بلکې طالبان ترې انکار هم کوي.