د پاکستان له پلازمېنې اسلام اباد نه ۲۸نور افغانان نن ماسپښین د جرمني د هانوور په لانګنهګن هوايي ډګر کې کوزیږي. دا ټول د پنځو کورنیو غړي دي او درې کاله په اسلام اباد کې منتظر وو. دوی به د فریدلنډ ګوټینګن ولسوالۍ د جذب کمپ ته ولیږدول شي.
د جرمني رسنیو د رپوټونو له مخې د پاکستان له پلازمېنې اسلام اباد نه د پنځو افغان کورنیو ۲۸ تنه غړي، چې د جرمني د منلو پروګرام په لړ کې ویزې ورته صادرې شوې، د هانوور هوايي ډګر ته رسیږي.
د دوی الوتکه نن د غرمي شاوخوا ۲ بجې په لانګنهګن کې راښکته کیږي او لومړی به د فریدلند (ګوټینګن ولسوالۍ) د جذب کمپ ته انتقال شي او له هغه ځایه به په بېلابېلو ایالتونو وویشل شي.
د یادونې وړ ده چې د تېر سپتمبر په پیل کې هم ۴۷ افغانان په همدې لاره هانوور ته رسېدلي وو.
اوس مهال شاوخوا ۱۹۱۰ کسان په پاکستان کې د جرمني د جذب پروګرام له لارې د ورتګ انتظار کوي.
همدارنګه شاوخوا ۲۵۰ افغانان چې ویزه یا د ورتګ اجازه لري، له پاکستان څخه افغانستان ته شړل شوي او د دوی د بیرته ستنونې هڅې روانې دي.