د پاکستان لپاره د وروستي جمهوري دولت د ولسمشر پخوانی ځانګړی استازی محمد عمر داودزی وايي، چې د طالبانو د لومړۍ دورې چارواکو دروغ نه ویل؛ مګر اوسني طالبان دروغجن او فریبکاره دي.
نوموړي له افغانستان انټرنشنل - پښتو سره په ځانګړي اېکس سپیس کې وویل، چې طالبان که څه هم د دروغو شعارونه ورکوي چې امریکا یې ماته کړې ده؛ خو یوه ورځ به ولیدل شي چې خپل وسایل او وسلې ټولوي او بیا پاکستان ته ځي.
داودزي د روسیې له خوا د طالبانو د رسمیت پېژندنې مساله د جیوپولیټیکي تغیراتو نتیجه وبلله زیاته یې کړه چې دا د طالبانو لاسته راوړنه نه ده.
د داودزي په خبره چې په افغانستان کې د داعش او نورو وسله والو موجودیت د سیمې هېوادونو ته ګواښ پېښ کړی دی.
د یادونې وړ ده، چې د طالبانو په نېږدې څلور کلنه واکمنۍ کې روسیه لومړی هېواد دی چې د یادې ډلې حکومت په رسمیت پېژني.