د طالبانو د کورنیو چارو وزارت ویلي، چې سراج الدین حقاني د ازبکستان د بهرنیو چارو وزیر سره لېدنه کې د دوه اړخیزو اقتصادي، سیاسي او فرهنګي اړیکو د لا پیاوړتیا غوښتنه کړې ده.
د طالبانو د کورنیو چارو وزارت د پنجشنبې په ورځ د یوې اعلامیې په خپرولو سره ویلي، چې سراج الدین حقاني د ازبکستان د بهرنیو چارو وزیر په مشرۍ ازبک پلاوي سره کتلي.
په اعلامیه کې ویل شوي، چې د طالبانو د کورنیو چارو وزیر او ازبک پلاوي د افغانستان، ازبکستان او پاکستان ترمنځ د اړیکو پراختیا، د سیاسي اقتصادي او فرهنګي همکارۍ ژورتیا او د دواړو هېوادونو د صادراتو او وارداتو کچې لوړېدو په اړه خبرې کړې دي.
د طالبانو اعلامیه کې د سعیدوف له قوله لیکل شوي چې« ازبکستان د افغانستان د کنګل شویو شتمنیو ازادېدو، د افغان کډوالو ستونزو حل او په نړیوالو ناستو کې د افغان حکومت فعال ګډون غوښتونکی دی.»
د یادې لېدنې په ترڅ کې سراج الدین حقاني د ازبکستان د بهرنیو چارو وزیر څخه غوښتنه کړې، چې په سیاسي، اقتصادي او فرهنګي برخو کې ورسره اړیکې لا پیاوړې کړي.