د پښتونخوا د خیبر ولسوالۍ په ګودر سیمه کې د اوبو یوې څاه د کارولو په سر د دوو ګاونډیانو په شخړه کې د یوې ښځې او دوو وروڼو په ګډون ۴ کسه وژل شوي دي.
د پولیسو په وینا؛ د شخړې پرمهال د دواړه خواوو ترمنځ ډزې تبادله شوې، چې پکې درې کسان ووژل شول او یوه مېرمنه سخته ټپي شوه.
پولیس وایي، ټپي شوې مېرمنه د درملنې لپاره د جمرود روغتون ته ولېږدول شوه؛ خو هغې د سختو ټپونو له امله په روغتون کې ساه ورکړه.
پولیسو زیاتوي، چې په دغه پېښه کې ښکېل کسان له سیمې څخه په تېښته بریالي شول؛ خو دوی د دغه کسانو د نیولو په اړه پوښتنې ګروېږنې پیل کړې دي.