پاکستاني طالبانو (ټي ټي پي) ادعا کړې ده، چې د شنبې او یکشنبې په ورځو یې د خېبر پښتنوخوا په بېلابېلو سیمو کې په پاکستاني امنیتي ځواکونو بریدونه کړي، چې له امله یې اته امنیتي کسان وژل شوي دي.
تحریک طالبان پاکستان په یوې اعلامیه کې ویلي، چې د یکشنبې په ورځ د خېبر ولسوالۍ اړوند د باړي په تېرا میدان کې یې د زنګي په پوسته وسله وال برید کړی، چې له امله یې یو پاکستانی امنیتی کس وژل دی.
همدا ډول په یو بل برید کې چې د تېرا دربار په سیمه کې یې ترسره کړی، درې امنیتي کسان نور هم وژلي دي.
په اعلامیه کې راغلي چې وسله والو یې د یکشنبې په ورځ غرمه مهال د شمالي وزیرستان اړوند د بویا همزوني په سیمه کې د پوځيانو په پوستې برید کړی، چې دوه امنیتي کسان یې وژلي دي.
د پاکستاني طالبانو په دغه اعلامیه کې راغلي، چې پرون یې وسله والو د باجوړ په سالارزو کې یو امنیتي کس او یو د استخباراتو کس وژلی دی.
د یادې ډلې د اعلامیې له مخې، د شمالي وزیرستان اړوند په میرانشا کې یې هم وسله والو بریدونه کړي، چې د پاکستان امنیتي ځواکونو ته یې مالي ځاني زیانونه اړولي دي.
د ټي ټي پي په دغه اعلامیه کې ادعا شوې، چې وسله والو یې د شنبې په ورځ دخېبر پښتونخوا ایالت د سوېلي وزیرستان اړوند په سره روغه او د دېره اسماعیل خان اړوند په کلاچې کې هم بریدونه ترسره کړي، چې مالي او ځاني زیانونه لري.
یاده دې وي، چې پاکستان کې د نا امنیو پېښې خورا زیاتې شوي، بلوچستان او خېبر پښتونخوا هغه ایالاتونه دي چې زیات وخت ترې د نا امنیو خبرونه ترلاسه کیږي.