د چارشنبې په ورځ لسګونه افغانان د برېتانیا پارلمان مخې ته راټول شول او پر افغانستان یې د پاکستان هوايي بریدونه وغندل. لاریون کوونکو وویل، چې د پاکستان په وروستیو بریدونو کې ملکي وګړي او عامه تاسیسات په نښه شوي دي.
دغه افغانان په لندن کې د برېتانیا د پارلمان مخې ته د افغانستان د پلازمېني په ګډون پر کندهار او پکتیکا ولایتونو د پاکستان د هوايي بریدونو په غبرګون کې راټول شوي وو او د پاکستان پر ضد یې شعارونه ورکول.
لاریون کوونکي وايي، چې پاکستان د خپلو ناکامیو پټولو په موخه پر افغانستان بریدونه وکړل.
د لاریونوالو په وینا، پر افغانستان د پاکستان په وروستیو بریدونو کې ملکي وګړي او عامه تاسیسات په نښه شوي دي.
یادو افغان لاریونوالو له نړیوالې ټولنې غوښتنه وکړه، چې د افغانستان پر حریم د اسلام اباد بریدونه په جرم حساب شي.
یادو افغانانو پر داسې مهال د برېتانیا پارلمان مخې ته د پاکستان پر ضد لاریون کړی، چې د طالبانو او پاکستاني ځواکونو ترمنځ له نښتو او هوايي بریدونو وروسته، دمګړی د افغانستان او پاکستان ترمنځ ټولې لارې تړل شوې او سوداګري په ټپه ولاړه ده.