د بریتانیا حکومت د سې شنبې په ورځ اعلان وکړ چې د سوریې «تحریر الشام» ډله یې د ترهګرو سازمانونو له نوملړه لرې کړې ده. دې ډلې د هغه وسلهوال اتحاد مشري کړې وه چې د سوریې پخوانی ولسمشر بشار الاسد یې له واکه لرې کړ.
تحریر الشام، چې د القاعدې پخوانۍ ملګرې ډله وه، په ۲۰۱۷ کال کې په رسمي ډول ترهګره وپیژندل شوه.
دا په دې معنا وه چې د بریتانیا قوانین د دې ډلې ملاتړ یا ورسره یوځای کېدل غیرقانوني ګڼي.
د بریتانیا حکومت د تېر کال په ډسمبر میاشت کې ویلي و چې دوی په تور نوملړ کې د دې ډلې شته والی بیا ارزولی شي.
بریتانیا له نورو هېوادونو سره یو ځای د اسد د استبدادي حکومت د پای ته رسېدو هرکلی کړی و، چې دا د منځني ختیځ په تاریخ کې د یو مهم بدلون نښه وه او له اوږدې کورنۍ جګړې وروسته رامنځته شوه.
د بریتانیا حکومت ویلي، چې له تور نوملړه د تحریر الشام نوم لرې کول به د سوریې نوي حکومت سره د نږدې اړیکو جوړولو امکان برابر کړي.