د طالبانو کورنیو چارو وزارت ویاند عبدالمتین قانع وایي چې د پولیسو رنجر موټر په تویټا موټرو بدلوي. هغه زیاتوي چې د پولیسو رینجر په داسې موترو بدلوي چې د افغانستان شرایطو او جغرافیې سره مطابقت ولري.
تر دې مخکې افغانستان انټرنشنل راپور ورکړی و چې طالبان د پولیسو رینجر موټرې بدلوي.
د طالبانو د کورنیو چارو وزارت یو رسمي سند چې د روان کال د (وري ۱۱مه) افغانستان انټرنشنل ترلاسه کړی و،څرګندوله چې دغه ډله غواړي رنجر موټر په ټویټا موټرو بدل کړي. په سند کې ویل شوي و، چې د تبادلې لپاره سروې او ټول معلومات باید راټول شي او د کورنیو چارو وزارت د معینانو په حضور کې مشرتابه ته وړاندې شي.
ترلاسه شوی سند د ۱۴۴۶ قمري کال د لسمې میاشتې پر ۱۱ مه نېټه د سراج الدین حقاني د دفتر رییس مولوي زین الله عابر له خوا لاسلیک شوی دی.
دا پرېکړه، د طالبانو معینانو، لویو رییسانو، د معینانو د دفتر رییسانو او مشاورینو په یوه ناسته کې شوې وه.
د طالبانو کورنیو چارو وزارت کې سرچینو افغانستان انټرنشنل ته ویلی و، چې دا پرېکړه د لګښتونو د کمولو په موخه شوې ده.
سرچینې ویلي و:« رینجر موټر زیات تېل مصرفوي او ددې رینجرو پرزو بیه هم لوړه ده، نو د مصارفو کمولو په موخه دا پرېکړه شوې ده.»
د طالبانو سرچینو په خبره، څه موده وړاندې شاوخوا ۳۰۰ هایلیکس او کرولا ډوله موټر هم ددې ډلې په کورنیو چارو وزارت کې پر ځینو مسوولینو وېشل شوي دي.
په ترلاسه شوي سند کې د کورنیو چارو وزارت د تامیناتي او تدارکاتي برخې د بودجې په هکله هم پرېکړه شوې ده.
په دې مکتوب کې لیکل شوي، چې د طالبانو کورنیو چارو وزارت د صلاحیت سقف دې له پنځه دېرش میلیونه افغانۍ نه پورته کیږي.
دمکتوب کې په پای کې لیکل شوي چې د کورنیو چارو وزارت د تامیناتي چارو معینیت ته دنده سپارل شوې، څو په دې اړه د مشرتابه عالي مقام ته وړاندیزونه تیار کړي. همداراز ویل شوي، کله چې د رینجر موټرو د تبادلې راپور د منظورۍ لپاره مشرتابه ته وړاندې کېږي، نو پورته یاد شوي وړاندیزونه دې هم ورسره یوځای شي.