طالبان وايي، په هرات کې ددې ډلې د امر بالمعروف محتسبانو درې یتیم ماشومان چې د خپلې میرې له خوا شکنجه او په کورني بند کې ساتل کېدل، ژغورلي دي.
په هرات کې د طالبانو امر بالمعروف رییس عزیزالرحمن المهاجر د دې ډلې تر واک لاندې باختر اژانس ته ویلي، چې درې یتیم ماشومان یې، چې د خپلې میرې له لوري شکنجه شوي او په کورني زندان کې ساتل کېدل، ژغورلي دي.
نوموړي ویلي چې د ماشومانو میره مور یې عدلي او قضايي ادارو ته ورپیژندلې ده.
طالبانو د یادو ماشومانو انځورونه هم خپاره کړې، چې پر بدن یې د وهلو ډبولو نښې هم ښکاريږي.
په هرات کې سیمه ییزو طالب چارواکو ویلي، چې د تېرو څلورو کلونو په اوږدو کې یې د ښځو او ماشومانو په ګډون لسګونه کسان له کورني زندان او شکنجو ژغورلي دي.