تحریک طالبان پاکستان ډلې د دوشنبې په ورځ د پاکستان د لومړي وزیر وروستۍ څرګندونې رد کړې او وايي، دوی «د پاکستاني ولس په منځ کې رېښې لري او خپل اهداف د خلکو په ملاتړ تعقیبوي». یاده ډله وايي، دوی د خپلو عملیاتو لپاره پر ګاونډیو هیوادونو تکیه نه کوي.
د یادې ډلې ویاند محمد خراساني د شهباز شریف څرګندونې بې اساسه ګڼلې دي او وايي، یوازې د پاکستان د امنیتي عملیاتو د ناکامیو پټولو لپاره شوې دي.
ټي ټي پي ټینګار کړی، چې «دا تحریک د دولت د ظلم او فشار پر وړاندې د ولسي ملاتړ په مرسته راپورته شوی او د خپلو عملیاتو لپاره پر ګاونډیو هیوادونو تکیه نه کوي».
خراساني د پاکستان پر دولت غږ کړی، چې د بلوڅ او پښتون ځوانانو جبري ورکیدل بند کړي او خپلو شتمنیو او حقونو ته د خلکو لاسرسی باوري کړي.
ډلې خبرداری ورکړی چې یوازې پوځي فشار د ستونزې حل نه دی، او ادعا کوي، چې په پاکستاني خاوره کې یې فعالیت شاوخوا ۲۰ کاله دوام کړی.
دا څرګندونې په داسې وخت کې دي، چې د پاکستان په شمال لویدیزو سرحدي سیمو کې د وسله والو ډلو پر وړاندې پوځي عملیات بیا بیا له ستونزو سره مخامخ شوي دي.