د افغانستان د کرېکټ ملي لوبډلې په اسیا جام سیالیو کې په خپله لومړۍ لوبه کې د سې شنبې په ماښام (د وږي ۱۸مه) هانګ کانک ته د ۹۴ منډو په توپیر ستره ماتې ورکړه.
د افغانستان د کرېکټ بورډ په وینا، دغه سیالۍ نن ماښام د متحده عربي اماراتو د ابوظبۍ په زاید کرېکټ لوبغالي کې د افغانستان په توپ وهنې سره پیل شوه او افغان اتلانو د ۶ لوبغاړو په زیان سره ۱۸۸ منډې جوړې او سیالې هانګ کانګ لوبډلې ته یې د ۱۸۹ منډو هدف وټاکه، خو سیاله هانګ کانګ لوبډله د یاد هدف په ترلاسه کولو بریالۍ نشوه او افغان اتلانو دغه سیالۍ د ۹۴ منډو په توپیر وګټله.
د افغان لوبډلې په ګټه صدیق الله اتل ۷۳، عظمت الله عمرزي په ۲۱ توپونو چټکې ۵۳ او محمد نبي ۳۳ منډې جوړې کړې.
د یادونې وړ ده، چې افغان اتلان به د اسیا جام سیالیو په دویمه لوبه کې راتلونکې سې شنبه د بنګله دېش کرېکټ ملي لوبډلې سره مخ شي.