د روسیې ولسمشر ولادیمیر پوتین د جمعې په ورځ د چین، هند او پخواني شوروي اتحاد د درېیو هېوادونو له مشرانو سره ټیلیفوني خبرې کړې او په دې خبرو کې یې له امریکا سره د خپلو راتلونکو خبرو او د اوکراین د جګړې په اړه معلومات شریک کړي دي.
پوتین د چهارشنبې په ورځ د امریکا د ولسمشر ډونالډ ټرمپ له استازي سټیو وېټکاف سره په مسکو کې ولیدل او تر لیدنې وروسته کرېملین اعلان وکړ، چې ښایي پوتین او ټرمپ په راتلونکې اونۍ کې سره وویني.
د چین ولسمشر شي جین پېنګ د امریکا او روسیې ترمنځ د خبرو هرکلی کړی او د هند لومړي وزیر نریندرا مودي هم له پوتین مننه وکړه، چې د اوکراین په اړه یې تازه معلومات ورسره شریک کړي.
دغه ډول پوتین د بېلاروس له ولسمشر الکسانډر لوکاشینکو، د قزاقستان او ازبکستان له مشرانو سره هم خبرې کړې دي.