د پاکستان د ښځو کرېکټ ملي لوبډلې د نړۍوالو لوبو لپاره خپل مهال وېش اعلان کړی دی. دغه مهال وېش چې د ۲۰۲۵ او ۲۰۲۶ کال لپاره دی، له پیاوړو لوبډولو سره د پاکستانۍ لوبډلې لپاره یو ورځنۍ او شل اوریزې سیالۍ په پام کې نیول شوې دي.
د پاکستان کرېکټ بورډ ویلي چې اعلان شوی مهال وېش به د دوو نړۍوالو جامونو لپاره د چمتووالي برخه وي.
د پاکستان د ښځو کرېکټ ملي لوبډله به د ۲۰۲۵ نړۍوال پنځوس اوريز جام او ۲۰۲۶ شل اوريز نړیوال جام کې برخه واخلي.
په اعلان شوي مهال وېش کې پاکستانۍ لوبډله له ایرلېنډ، سوېلي افریقا، زمبابوې او وېسټ انډیز سره یو ورځنۍ او شل اوریزې لوبې لري.
د ښځو د کرېکټ د نړیوال جام یو ورځنی سیالۍ به د روان کال په اکټوبر او شل اوریزې سیالي به یې د راتلونکې ۲۰۲۶ کال په جون میاشت کې ترسره شي.