په افغانستان کې د بریټانیايي ځواکونو د افغان همکارانو د شخصي معلوماتو له افشا کېدو وروسته د برېټانیا حکومت افغانان په بې نښې الوتکو کې د بریټانیا سټانسټېډ هوايي ډګر ته لېږدوي او بیا په هوټلونو او یا هم نظامي اډو کې ځای پر ځای کېږي.
ډيلي مېل ورځپاڼه وايي، له ۲۳ میاشتو پلټنو وروسته پر دې بریالي شول چې د دغو پټو عملیاتو په اړه معلومات ترلاسه کړي او په وینا یې تر اوسه د دغه هېواد پارلمان له دغو عملیاتو بې خبره ساتل شوی و.
تېره ورځ د برېټانیا دفاع وزیر وویل، چې دغه پروسه سر له نن نه بنده شوه.
د بریټانیا حکومت دغه پټ د کډوالۍ عملیات روبیفیک عملیات بولي او وروسته له هغې پیل شول چې، د دغه هېواد دفاع وزارت په ناپامۍ سره په افغانستان کې د بریټانیایي ځواکونو د افغان همکارانو معلومات خپاره کړل او ورسره جوخت دا وېره خپره شوه چې ګنې طالبان به د دغو معلوماتو په وسیله د بریټانیايي ځواکونو افغان همکاران تر موندنې وروسته ووژني.
د راپور له مخې، له افغانستان نه د بریټانیايي ځواکونو په مرسته را اېستل شوي افغانان لومړی پاکستان ته لېږدول کېږي او بیا هلته په اسلاماباد ښار کې له روغتیايي معایناتو او امنیتي ارزونو وروسته د بریټانیا دوو هوايي ډګرونو سټانسټېډ او نظامي بریز نورټون ته لېږدول کېږي.