د هرات لپاره د طالبانو د اطلاعاتو او فرهنګ مشر او د کډوالو د چارو د کمېسیون د اطلاعاتو او عامه پوهاوي کمېټې مسوول احمد الله متقي وايي، چې په ورځنۍ کچه له ایرانه د افغان کډوالو د ستنولو لړۍ روانه ده.
نوموړي د طالبانو ترکنټرول لاندې باختر اژانس سره په مرکه کې ویلي، چې په راستانه شویو شاوخوا درې لکه او څلوېښت زره کسانو کې ډېری یې په جبري توګه له ایرانه اېستل شوي دي.
که څه هم له ایرانه یو شمېر راستانه شویو کډوالو د افغانستان انټرنشل په ګډون له ځینو رسنیو سره د امکاناتو او اسانتیاوو د نشتوالي له کبله شکایتونه کړي دي؛ خو دغه طالب چارواکی بیا ادعا کوي، چې د راستنېدونکو لپاره د اسلام کلا سربېره په ټولو ولایتونو کې د پام وړ اسانتیاوې په پام کې نیول شوي دي.