د سعودي عربستان د النصر فوټبال لوبډلې ستوری کریسټیانو رونالډو له دغه لوبډلې سره د دوه کلن قرار داد تر غځولو وروسته هیله څرګنده کړې، چې ژر به له النصر لوبډلې سره اتلولي وګټي او سعودي عربستان ته یې ځانګړی ارزښت ورکړ.
هغه وویل:«زه پرتګالي یم خو زه د سعودي عربستان برخه یم.»
رونالډو د سعودي د ولیعهد محمد بن سلمان ستاینه وکړه او د سعودي عربستان د فوټبال لیګ په اړه یې وویل: «ما دا مخکې ویلي دي او اوس هم په ډاډ سره وایم، چې د سعودي لیګ د نړۍ له پنځو غوره لیګونو څخه یو دی. هغه کسان چې وايي رونالډو یوازې د خپل لیګ ستاینه کوي دا رښتیا نه دي، بلکي هغوی د فوټبال په معنا نه پوهېږي.»
رونالډو د لوبغالو د نړۍوال جام په اړه د خپلو وړاندیزونو په اړه وویل: «زه غواړم ځان د ۲۰۲۶ نړۍوال جام لپاره په غوره ډول چمتو کړم. زه پرتګالی یم؛ خو اوس ځان د سعودي عربستان برخه ګڼم. له هغه ورځې چې دلته راغلی یم، یوازې د النصر نه، بلکې د ټول سعودي فوټبال د بدلون مسولویت مې پر غاړه واخیست. لکه څنګه مې چې مخکې هم ویلي، هېڅ شک نه لرم چې موږ به له النصر سره ګڼ شمېر مهم جامونه وګټو.»