د ایران د اېراف ورځپاڼې د راپور له مخې؛ ایران پرېکړه کړې، چې د سیمې په یوې لویه پانګونه کې برخه واخلي او د افغانستان د اوسپنې په کانونو کې پنځه میلیارد ډالره پانګونه وکړي.
په راپور کې راغلي، دغه پانګونه چې کولای شي په راتلونکو پنځو کلونو کې ایران ته تر ۳۰ میلیارډ ډالرو زیاته ګټه ورسوي؛ په کورنیو سرچینو به د ایران د تکیې کمولو او د فولادو په نړۍوال صنعت کې به د دغه هېواد د ځای ځایګي په لوړولو کې مرسته وکړي.
راپور زیاتوي، چې د اټکل له مخې ایران د افغانستان یو ټن اوسپنه د ۱۰۰ ډالرو په ارزښت واردوي او تر پروسس وروسته یې په فولادو بدلوي او بیا یې د ۶۰۰ ډالرو په ارزښت صادروي چې دا د فولادو په صنعت کې د ایران د پام وړ وده ښیي.
د راپور په ټکو؛ تر دې دمه ایران د افغانستان کانونو او په ځانګړې توګه د اوسپنې په کانونو کې شاوخوا ۲.۳ مېلیارده ډالره پانګونه کړې ده.
راپور وړاندې کاږي، چې د دواړو هېوادونو ترمنځ په دې برخه کې تړونونه پنځه کلن دي.
په راپور کې راغلي، دغه تړونونه نه یوازې د ایران په ګټه دي؛ بلکې د دواړو هېوادونو ترمنځ به په راتلونکو کلونو کې د اقتصادي، امنیتي او سیاسي اړیکو د پیاوړتیا لامل شي.
له بل پلوه په افغانستان کې د ایران سفیر علي رضا بېکدلي ویلي، چې «د افغانستان بډایه کاني سرچینو د ایران او افغانستان ترمنځ د اقتصادي همکارۍ لپاره بې ساري فرصتونه برابر کړي دي.»