د روسیې د اورینبورګ ولایت د نووترویتسک کروم ترکیبي موادو فابریکه،چې د اومو توکو د نشتوالي له امله یې فعالیت درېدلی و، د تولید د بیا پیل لپاره چمتووالی نیسي.
د اورینبورګ سیمې د صنعت او انرژۍ وزارت په وینا، له افغانستان او ایران سره د کرومایټ ډبرو د واردولو هوکړه شوې ده، او اوس مهال د ترانسپورت لارو چارو ارزونه روانه ده.
دغه فابریکه د مارچ پر۱۳مه د قزاقستاني شرکتونو «کازکروم» او «وُسخود ټرېډینګ» لهخوا د ډبرو د بندېدو له امله وتړل شوه.
د روسیې صنعت وزارت بیا د بدیلو عرضه کوونکو د موندلو لپاره بېړنۍ ناسته کړې ده.
اوس تمه کېږي چې له افغانستان او ایران نه نوي مواد یا کرومایټ ډبرې فابریکې ته ورسېږي، نو به وکولای شي چې تولید بیا پیل کړي.
د روسي سرچینو د رپوټ له مخې، یاده فابریکه په ۱۹۶۳ کال کې تاسیس شوې او د کرومایټ د پروسس په برخه کې تخصص لري.
د دې فابریکې محصولات په داخلي او نړیوالو بازارونو کې د بېلابېلو صنعتونو لپاره کارېږي.