د طالبانو د بهرنیو چارو وزارت د متحده عربي اماراتو په بېلابېلو زندانونو کې د ۵۴ افغان بندیانو نوملړ خپور کړی او وايي، له دغه هېواد سره یې د دوی د خوشي کېدو هوکړه کړې ده.
د طالبانو د بهرنیو چارو وزارت وايي، په ابوظبۍ کې د دغې ډلې سفارت په هلو ځلو د متحده عربي اماراتو له بېلابېلو بندخونو د دې بندیانو د خوشي کېدو هوکړه وشوه.
طالبانو دا نه دې ویلي، چې په متحده عربي اماراتو کې څومره افغانان بندیان دي.
د بهرنیو چارو وزارت د متحده عربي اماراتو له رییس شیخ محمد بن زاید ال نهیان مننه کړې او دا ګام یې د دواړو هېوادونو ترمنځ د دوه اړخیزو او دوستانه اړیکو د پالنې څرګندويي بولي.
طالبانو د متحده عربي اماراتو له زندانو د راخوشې کېدونکو افغانانو نوملړ خپور کړی، خو دایې نه دي ویلي، چې دا افغانانو په کوم جرم بندیان شوي او کله به له زندانه راخوشې شي.
په متحده عربي اماراتو کې ګڼ شمېر افغانان اوسیږي، چې یو برخه یې خپله سوداګرې کوي او ګڼ شمېر بیا کارګر دي.