د سعودي عربستان د حج او عمرې وزیر توفیق الربیع د دوشنبې په ورځ وویل، چې په ۲۰۲۴ کال کې له ۱۸،۵ میلیونو څخه زیاتو بهرنیو حاجیانو د حج او عمرې مراسم ترسره کړي دي.
الربیع په جده کې د حج او عمرې د کنفرانس او نندارتون په څلورمه ناسته کې د وینا پر مهال وویل، چې دا د پاچا سلمان په لارښوونو د ولیعهد محمد بن سلمان لاسته راوړنه ده.
نوموړي په وروستیو پرمختګونو په تېره بیا روضه شریف کې د نبوي جومات د زیارت کونکو په اړه وویل، چې په ۲۰۲۲ کال کې د زیارت کوونکو شمېر څلور میلیونه کسان وو، خو په ۲۰۲۴ کال کې بیا دا شمېر ۱۳ میلیونو ته لوړه شوی.
په دغه ناسته کې وزیر د "نووسک" ایپ یوه پرمختللې نسخه هم وړاندې کړه، چې اوس ۱۰۰ اضافي خدمتونه وړاندې کوي او د زیارت تجربې چمتو کولو لپاره ډیزاین شوی.
الربیع په تېر کې ستونزې ومنلې، چې حاجیان د خپلو مذهبي مراسمو په ترسره کولو کې ورسره مخ وو.
نوموړي وويل: "د زيارت سفر، چې يو وخت له ستونزو او ستړياوو ډک و، اوس په يوه اسانتيا او ډاډمنتيا بدل شوى، چې ټولو حاجيانو ته هر اړخيز خدمتونه شتون لري."