د بنګله دېش د جنګي جرمونو محکمې پلټونکې ډلې د دوشنبې په ورځ وویل، دغې محکمې چې د پخوانۍ لومړۍ وزیرې شیخ حسینې لهخوا جوړه شوې؛ د هغو ناکراریو په اړه چې هغه یې تېښتې ته اړ اېستې وه، د "ډلهییزې وژنې" درې څېړنې یې پیل کړې دي.»
د شیخ حسینې د ۱۵ کلنې استبدادي واکمنۍ پر ضد د زدهکړیالانو په مشرۍ د لاریونونو په ترڅ کې تر ۴۵۰ ډېر کسان ووژل شول، چې ډېر یې د پولیسو د ډزو له امله وژل شوي دي.
د محکمې د څېړنې څانګې مرستیال عطا الرحمن وویل:« موږ په دې پړاو کې لومړني شواهد راټولوو او قضیې د "ډلهییزې وژنې" سره تړاو لري.»
هغه وایي، قضیې د پلازمینې ډاکه په شاوخوا یا نږدې ولسوالیو کې په میرپور، منشي ګنج او ساور کې د تاوتریخوالي سره تړاو لري.
د سیمهییزو رسنیو د راپورونو له مخې، په ټول بنګله دېش کې د سیمهییزو پولیسو په حوزو کې د شیخ حسینې خلاف لږ تر لږه ۱۵ قضیې ثبت شوې دي.
د بنګله دېش د جرمونو نړۍواله محکمه په ۲۰۱۰کال کې د شیخ حسینې لهخوا د دغه هېواد د ازادۍ جګړې پرمهال د جرمونو د پلټنو لپاره جوړه شوې وه.
د حسینې په مشرۍ دغې محکمې د هغې د څو سیاسي مخالفینو په ګډون له ۱۰۰ څخه ډېر کسان په اعدام محکوم کړي وو.
د شیخ حسینې حکومت د بشري حقونو په پراخه سرغړونو تورن و، چې په کې د هغې د زرګونو سیاسي مخالفینو وژنې هم شاملې دي.
ملګرو ملتونو د جمعې په ورځ وویل، داسې پیاوړې نښې نښانې شته چې ښیي د بنګله دېش امنیتي ځواکونو د زدهکړیالانو په مشرۍ د لاریونونو د مخنیوي لپاره غیر ضروري ځواک کارولی دی.
په ادعا شویو سرغړونو کې غیر قضایي وژنې، په خپل سر نیول او بندیانول، جبري ورکېدل، ربړوونه او ناوړه چلند شامل دي.