د جمهوري نظام پر مهال د ولسمشر لومړي مرستیال امرالله صالح ادعا کړې چې د ۲۰۲۵ د ډسمبر په ۸مه نېټه، متحده ایالاتو کابل ته د طالبانو لپاره ۴۵ مېلیونه ډالر په نقدي بڼه استولي دي. هغه زیاته کړې، دا پېسې داسې مهال استول شوي چې افغانستان د امریکا د ملي امنیت په ستراتېژۍ کې ځای نه لري.
امرالله صالح په اېکس لیکلي چې د امریکا حکومت طالبانو ته تازه چاپ شوې ۴۵ مېلیونه ډالر په نقدي ډول استولي چې د «موالم ایرلاینز» ځانګړې الوتکه کې کابل ته وړل شوي. صالح په حیرانتیا سره لیکلي: «افغانستان د امریکا د ملي امنیت په ستراتېژۍ کې نه دی شامل، او بیا هم دومره لویه مرسته استول کېږي. حیرانوونکې موضوع ده».
هغه همدارنګه په خپل ټویټ کې د امریکايي کانګرس غړی ټیم برچټ هم منشن کړی.
صالح د دې عمل پر وړاندې د نړیوالو اړیکو او د افغانستان د حالاتو په اړه اندېښنه څرګنده کړې، او ویلې یې دي چې دا ډول اقدامات د هېواد امنیتي او سیاسي وضعیت پیچلی کوي.