د طالبانو د لوړو زده کړو وزارت علمي مرستیال ضیاالرحمان مدني د البیروني پوهنتون د طب پوهنځي زدهکړیالانو په فراغتغونډه کې یادو فارغانو ته په خطاب کې وویل، یوازې په لېسانس زدهکړو بسنه ونهکړي او له لا زیاتو هڅو، ژمنتیا او تسلسل سره دې نورې زدهکړې هم تعقیب کړي.
دغه وزارت د یکشنبې په ورځ (د لیندۍ ۱۶مه) په یوې خبرپاڼه کې ویلي، ضیاالرحمان مدني په دې غونډه کې څرګنده کړه: «د معاصر طبابت پرمختګ، د دوامداره زدهکړې غوښتنه کوي او راتلونکی نسل باید د تخصص او لوړو مهارتونو ډګر په علم، اخلاقو او تقوا روښانه کړي.»
نوموړي همداراز وویل، د انسان د روغتیا په برخه کې لومړني ستر پرمختګونه اسلامي پوهانو او د امت سترو علماوو کړي او په وینا یې علمي میراث اوسمهال هم د طب د معاصر پرمختګ اساس جوړوي.
د یادونې وړ ده، چې د البیروني پوهنتون له طب پوهنځي څخه په ۱۸مه دوره کې له نجونو زدهکړیالانو پرته ۹۴تنه فارغ شول.