د امریکا د جیولوژیکي سروې ادارې خبر ورکړ، چې د ریښتر په کچه ۵.۱درجې زلزلې د افغانستان د بدخشان ولایت سرحدي سیمې لړزولي. د زلزلې مرکز په اشکاشم ولسوالۍ کې و او ژوروالی یې ۳۴کیلومتره و.
یاده اداره وایي چې دا زلزله دوشنبه په سیمه ییز وخت د شپې پر ۱۱:۱۶بجو وشوه.
زلزله په کابل، ننګرهار، کندوز او د افغانستان په یو شمېر نورو ولایتونو کې هم احساس شوې ده.
په ورته ډول، د پاکستان جیولوژیکي سروې ادارې هم راپور ورکړی چې د زلزلې شدت په اسلام اباد، راولپنډۍ، چترال او سوات ښارونو کې احساس شوي. دغه ادارې وویلي چې د زلزلې شدت ۵.۳درجې و.
تر اوسه پورې، د دې زلزلې له امله د احتمالي زیانونو په اړه کره معلومات نشته.