نن شنبه (د تلې ۵مه) ګوګل ۲۷ کلن شو او خپله کلیزه یې ونمانځله. دا کلیزه د طالبانو د هغو هڅو سره همهاله نمانځل کېږي، چې غواړي په افغانستان کې انټرنېټ ته لاسرسی نور هم محدود کړي، خو په تېرو ۱۲ میاشتو کې په ګوګل کې افغانانو د پنځو نومونو په ډله کې "فلم" او "سندرې" زیاتې لټولي دي.
د بیا ځلي واک ته له رسیدو راهیسې طالبانو په موسیقۍ او سینما سخت بندیزونه لګولي دي. په راډیو، ټلویزیون او عامه ځایونو کې د موسیقۍ خپریدل منع شوي او ډېری رسنۍ اړ شوي چې خپلې تفریحي خپرونې بندې کړي.
په وروستیو کلونو کې د امر بالمعروف وزارت په بېلابېلو ښارونو کې ځوانان د موسیقۍ غږولو یا اوریدلو له امله نیولي او سزا یې ورکړې ده.
په لویو ښارونو لکه کابل او هرات کې سینماګانې تړل شوي دي او طالبانو د موسیقۍ وسایل ضبط کړي یا یې سوځولي دي.
ډېری هنرمندان او فلم جوړونکي له هېواده وتلي یا یې خپل فعالیتونه بند کړي دي.
د دې محدودیتونو سره سره د موسیقۍ او فلمونو سره د خلکو علاقه کمه شوې نه ده.
په تېرو ۱۲ میاشتو کې، د "فلم" او "سندرې" کلمې په ګوګل کې د افغان کاروونکو لپاره د پنځو غوره کلیمو څخه دي، چې په ګوګل کې یې لټولي دي.