د بلوچستان د کېچ ولسوالۍ د دشت او مند علاقداریو ترمنځ د پاکستان پر امنیتي ځواکونو د سرک غاړې ماین چاودنه شوې ده. په دې چاودنه کې لږترلږه د پنځو پوځیانو د وژل کېدو خبر ور کړل شوی.
پاکستاني رسنیو خبر ورکړی، چې دا پېښه نن سهار شوې ده.
له چاودنې وروسته د پاکستان امنیتي ځواکونو سیمه محاصره کړې او چاڼیز عملیات یې پیل کړي دي.
تر اوسه پورې کومې وسله والې ډلې د برید مسوولیت پر غاړه نه دی اخیستی او نه هم تر دې دمه د پاکستان پوځ عامه اړیکو دفتر کوم غبرګون ښودلی دی.