امریکا له خپلو متحدانو«جي ۷»هېوادونو غوښتي چې پر هغو هېوادونو تعرفې ولګوي، چې د روسیې له نفتو سره پراخه سوداګري کوي، په ځانګړي ډول هند او چین.
د امریکا د خزانې وزیر«سکاټ بسنټ»، د جمعې په ورځ د جي ۷هېوادونو د مالي وزیرانو سره تر یوې ویډیويي ناستې وروسته وویل، چې یوازې د همغږي شوي اقتصادي فشار له لارې کېدای شي د روسیې د عایداتو هغه سرچینې وچې شي چې د «پوتین د جګړې ماشین» ته تمویل برابروي.
په دغه ناسته کې د جي ۷هېوادونو وزیرانو د روسیې پر ضد د لا نورو بندیزونو او همدارنګه د تعرفو پر لګولو بحث کړی، په ځانګړې توکه هغه هېوادونو چې د دوی په وینا د اوکراین د جګړې ملاتړ کوي.
امریکايي چارواکي ټینګار کوي چې د روسیې پر نفتو تعرفې به د مسکو پر اقتصاد مستقیم فشار زیات کړي او هند او چین به اړ کړي چې له روسیې سره د انرژۍ په برخه کې خپلې راکړې ورکړې محدودې کړي.
که څه هم هند او چین د روسیې له مهمو اقتصادي شریکانو ګڼل کېږي، خو تر دې دمه یې د لویدیځو فشارونو پر وړاندې د روسیې د نفتو پېرلو ته دوام ورکړی دی.