د جرمني د زرغون ګوند مشر فلیکس بانازاک د برلین له اسلام اباد میشتو افغان محلي همکارانو سره د خپل دولت چلند «شرم وړ» بللی دی. بانازاک له حکومت نه غوښتي، چې له اسلام اباده افغانستان ته اخراج شوي افغانان بېرته راستانه کړي.

د جرمني د زرغون ګوند مشر فلیکس بانازاک ددغه هېود له ډي پي اې خبري اژانس سره په مرکه کې وویل، چې حکومت بې پروا دی، په داسې حال کې چې د پاکستان پولیس د جرمني د نړیوالو همکاریو سازمان (GIZ) په ودانیو کې میشت افغانان نیسي او افغانستان ته یې لیږي.

بانازاک وویل: «دا یو سکېنډل دی.». د نوموړي په وینا، د بهرنیو چارو وزیر یوهان وادیفول ښایي له خپلو پاکستانی سیالانو سره خبرې نه وي کړې، یا هغوی ورته غوږ نه دی نیولی.

په پاکستان کې دمګړۍ له ۲۰۰۰ ډېر افغانان د جرمني د مختلفو پروګرامونو په چوکاټ کې برلین ته د تګ په انتظار دي.

دوی د جرمني حکومت پخواني محلي همکاران یا له ګواښ سره مخ ګڼل شوي کسان دي. ډیرې افغان پناه غوښتونکي په اسلام اباد کې میشت دي او ځینې یې په پاکستان کې نیول شوي او ځینې یې افغانستان ته استول شوي دي.

بانازاک ټینګار کړی چې جرمني باید له پاکستان سره روښانه تړونونه وکړي چې نور څوک افغانستان ته اخراج نه شي.

بانازاک زیاته کړه: «پخوانیو محلي کارکوونکو د جرمني د خدمت لپاره خپل ژوند په خطر کې اچولی و. هغوی د فدرالي حکومت د اوسني چلند مستحق نه دي».