د اسراییل هوايي ځواکونو په یمن کې د ایران پلوه یاغیانو پر مرکزونو پراخ بریدونه وکړل. په بریدونو کې د صنعا پلازمېنه او شمال پلو الجوف ولایت په نښه شوي دي. د اسراییل پوځ ویلي، چې په عملیاتو کې تر ۱۰ ډېرې جنګي الوتکې ښکېلې وې او پر ۱۵ اهدافو یې شاوخوا ۳۰ بمونه غورځولي دي.
د اسراییلي پوځ په وینا، بریدونه د حوثي ځواکونو پر پوځي کمپونو، د هغوی د نظامي تبلیغاتو پر ریاست او د تېلو پر یو زېرمتون شوي دي.
ځايي اوسېدونکو رویټرز ته ویلي، برید د دوو غرو تر منځ پر هغه ځای شوی چې د حوثي ځواکونو د قوماندې او کنټرول مرکز په توګه کارېږي.
عیني شاهدان زیاتوي، د حوثيانو دفاع وزارت هم د بریدونو هدف ګرځېدلی دی.
اسراییل څرګنده کړې، دغه عملیات د هغو بېپیلوټه الوتکو او توغندیو په ځواب کې شوي چې د حوثي ډلې له لوري د اسراییل پر لور توغول شوي وو.