د ایران د ولسمشر اجرایه مرستیال محمدجعفر قایمپناه وايي، تهران د چابهار اورګاډي پټلۍ د بشپړولو او د ایران رېل پټلۍ له شبکې سره د نښلونې لپاره جدي هڅې کوي. هغه ټینګار کړی، چې دغه بندر به زر له نړیوال ریلي دهلیز سره یوځای شي.
د ایران د ولسمشر اجرایه مرستیال محمدجعفر قایمپناه ددغه هېواد د سیستان او بلوچستان له والي او د ځايي چارواکو له یوې ډلې سره د چارشنبې په ورځ په چابهار ولسوالۍ کې وکتل او ویې ویل، چې ډېر زر به چابهار د رېل پټلۍ له نړیوال کوریډور سره وصل شي.
د دغه سفر موخه د ایران د سیمهییزو مهمو اقتصادي او بنسټیزو پروژو د پرمختګ ارزونه ښودل شوې ده.
د ایرنا او نورو ایراني رسنیو د رپوټ له مخې، هغه وویل، چې دغه وصل به د نړیوال کوریدور د جوړېدو زمینه برابره کړي او کولی شي مهم توکي له چابهار بندره شمال ته او له هغه ځایه قفقاز، روسیې او اروپا ته انتقال کړي او د ایران د سیمهییز او نړیوال تجارت ونډه پیاوړې کړي.