په پښتونخوا کې د طبیعي پېښو د مدیرت ادارې ویلي، چې د پښتونخوا په بېلابېلو سیمو کې د سختو ورښتونو او سېلابونو له کبله ۱۳ کسان مړه او ۵۲ نور ټپیان شوي دي.
د چارواکو د معلوماتو له مخې؛ د روانې اګسټ میاشتې له ۱۵مې نېټې راهیسې په پښتونخوا کې ۴۰۹ کسان مړه او ۲۵۱ نور ټپیان شوي دي.
ځایي چارواکي وايي، چې د سختو ورښتونو او سېلابونو له کبله د برېښنا رسولو چارې ټکنۍ شوې، عامه تاسیساتو ته زیان رسېدلی او زرګونه کورنۍ له خپلو سیمو بېځایه شوې دي.
د طبیعي پېښو د مدیریت ادارې د معلوماتو پربنسټ؛ د وروستیو سختو ورښتونو او سېلابونو له کبله په پاکستان کې د مړو شمېر ۷۸۸ ته رسېدلی دی.