د خېبرپښتونخوا په باجوړ ولسوالۍ کې لسګونه کورنۍ د خپلو مېنو پرېښودو ته اړې شوې دي. دا کورنۍ وروسته تر هغې د خپلو مېنو پرېږدو ته اړې شوې، چې پاکستاني پوځ په دغه سیمه کې د پوځي عملیاتو خبرداری ورکړی دی.
په سیمه کې باخبره سرچینو افغانستان انټرنشل-پښتو ته ویلي، چې د تلونکو کورنیو شمېر لسګونو ته رسېږي او ښايي د ورځې په اږدو کې به دغه شمېر لا زیات شي.
دا په داسې حال کې ده، چې د خېبرپښتونخوا د باجوړ ولسوالۍ په ۱۶ سیمو کې درې ورځنی اعلان شوی ګرځبنديز لاهم دوام لري.
له بل پلوه په مومند ولسوالۍ کې ګڼو کسانو نن (چهارشنبه، د زمري ۸مه) په باجوړ کې د پوځي علمیاتو اعلان شوي ګرځبندیز او ناسم امنیتي وضعیت په غبرګون کې لاریون کړی دی.
باجوړ له وروستیو څو میاشتو راهیسې د پاکستاني ځواکونو او ټيټيپي وسلهوالې ډلې ترمنځ د تاوتریخوالي او سختو نښتو پر مرکز بدل شوی دی.