د اسراییل د لومړي وزیر دفتر په یوې خبرپاڼه کې ویلي، چې دغه هېواد هره ورځ غزې ته د پام وړ اوبو، خوراکي توکو او درملو د داخلېدو اجازه ورکوي، خو حماس بشردوستانه مرستې غلا کوي او پر ملکیانو ډزې کوي، ترڅو مرستو ته د هغوی د لاسرسي مخه ونیسي.
په دې خبرپاڼه کې راغلي: «سره له دې چې په غزه کې وضعیت سخت دی او اسراییل هڅه کوي مرستې ورسوي، خو حماس د ځینو ویډیوګانو او انځورونو له لارې هڅه کوي، چې د غزې انساني ناورین لوی وښيي.»
د اسراییل د لومړي وزیر دفتر زیاته کړې، چې دغه هېواد به له نړۍوالو بنسټونو، امریکا او اروپايي هېوادونو سره خپلې همکارۍ ته دوام ورکړي، ترڅو غزې ته د بشردوستانه مرستو پراخ لېږد تضمین شي.