امنيتي ادارو د پنجشنبه په ورځ د سوات د یوې دینې مدرسې د زده کوونکي د وژنې په تړاو ۱۱ مشکوک کسان د دوو ورځو څېړونو لپاره د خوازه خيلو قضايي ادارې ته سپارلي.
د سوات په چليار کلي کې يو ځوان زده کوونکی د دوشنبه په ماښام د مدرسې د ښوونکي له خوا په وهلو کې وژل شوی و.
د راپورونو له مخي، د سوات د چليار دغه مدرسه، چې زده کوونکی په کې وژل شوی د ځايي حکومت سره هم ثبت نه وه.
وژل شوی زده کوونکی د نورو ښوونکو او زده کوونکو له خوا روغتون ته وړ شوی، چې په روغتون کې يې ساه ورکړې.
تر پيښې يوه ورځ وروسته ځایي پولیسو اعلان وکړ، چې د غيري راجسټر مدرسې د مدیر په ګډون يې ۱۱ شکمن کسان نيولي، چې دا مهال تر څېړونو لاندې دي.
د چارواکو په خبره، پولیسو دغه ۱۱ شکمن کسان د خوازه خيلو قضايي ادارې ته سپارلې.
د سوات د پولیسو یوه افسر عمرخان رسنیو ته ویلي، چې د پاتې دوو شکمنو کسانو د نیولو لپاره یې هم خاصه ډله جوړې کړې او عملیات يې شروع کړي دي.
تر پيښې وروسته پوليسو ویلي، چې دغه مدرسه يې تړلې او ټول کارکوونکي يې نیولي دي.