د طالبانو د اقتصادي کمېسیون تخنیکي کمېټې په خپله نوبتي غونډه کې د کبانو سکټور د پراختیا طرحه تایید کړې، چې له مخې به یې په ټول هېواد کې د کبانو د روزنې ۷۷۰۰ فارمونه جوړ شي.
یادې کمېټې د سې شنبې په ورځ وویل، چې د دغو فارمونو په جوړېدو سره به د کبانو تر ۹۰ سلنې اړتیا وړ غوښه برابره شي او شاوخوا ۳۰۰ زره هېوادوالو ته به په مستقیم او غیر مستقیم ډول د کار زمینه هم پکې برابره شي.
د کمېټې د معلوماتو پر بنسټ، دغه طرحه د نهايي کېدو لپاره اقتصادي کمېسیون ته راجع شوې ده.