د افغانستان لپاره د متحده ایالاتو پخواني ځانګړي استازي زلمي خلیلزاد ادعا کړې چې هند په خپلو بریدونو کې د جیش محمد ډلې د مشر مسعود اظهر ورور عبدالرووف اظهر وژلی، نوموړي د اظهر په وژلو له هند مننه کړې.
هند د پاکستان په بېلابېلو سیمو کې له تېرو دوه ورځو راپدېخوا هوایي او ځمکني بریدونه پېل کړي چې پکې لسګونه کسانو ته مرګ ژوبله اخوښتې ده.
زلمي خلیلزاد په ایکس ادعا کړې چې هند په دغه بریدونو کې د جیش محمد ډلې د مشر ورور عبدالرووف اظهر وژلی دی.
نوموړي لیکلي: «د پاکستان پر ضد د روانو پوځي عملیاتو په ترڅ کې، هند بریالی شوی چې ظالم ترهګر عبدالروف اظهر ووژني، هغه څوک چې په ۲۰۰۲ کال کې یې د "وال سټریټ ژورنال" خبریال ډینیل پرل سر یې په بېرحمانه توګه پرې کړی و. دا یوه هغه پېښه وه چې د نړۍ خلک یې لا هم یاد لري. عدالت تأمین شو. له هند څخه مننه.»
د جیش محمد مشر، مسعود اظهر، ورور عبدالرووف اظهر په ۱۹۷۴ ز کال کې په پاکستان کې زېږېدلی دی. هند پر هغه تور لګوي چې په ګڼو ترهګریزو بریدونو کې لاس لري. په دغو پېښو کې د ۱۹۹۹ ز کال د هندي الوتکې (IC 814) تښتونه، د ۲۰۰۱ ز کال د هند پارلمان برید، او د ۲۰۱۶ ز کال په پټانکوټ کې د هندي هوایي ځواکونو پر اډې برید شامل دي.
د امریکا د خزانې وزارت په دسمبر ۲۰۱۰ کې پر عبدالرووف بندیز ولګاوه او په یوه بیان کې یې وویل: "عبدالرووف د جیش محمد یو لوړپوړی مشر دی چې د یادې ډلې لپاره فعالیت کوي."
د امریکا متحده ایالات وايي چې عبدالرووف اظهر، د جیش محمد د مشرانو په توګه، له پاکستانیانو غوښتنه کړې وه چې د سختدریځو فعالیتونو برخه وګرځي. نوموړی په ۲۰۰۷ ز کال کې د جیش محمد سرپرست مشر او د دې ډلې د استخباراتي چارو همغږی کوونکی پاتې شوی دی. پر هغه دا تور هم لګېدلی چې په هند کې یې د ځانمرګو بریدونو د تنظیم مسؤولیت درلود. نوموړی د جیش محمد له سیاسي څانګې او د روزنې له څانګې سره هم تړاو درلود.