د پاکستان ولسمشر وايي، اسلام اباد له ټولو ګاونډیانو سره ښه اړیکي غواړي، خو د خپل ملي حاکمیت پر سر له چا سره سودا هم نشي کولی.
اصف علي زرداري وايي، پاکستان سوله پال او مسوول اټومي هېواد دی، خو د بې ثابته کولو لپاره یې د یوې ډلې ترهګریزې هڅې هم نشي زعملی.
ښاغلي زرداري نن دا خبرې د مارچ پر ۲۳ د یوم پاکستان یا د پاکستان ورځ په نوم غونډې ته په وینا کې وکړې.
هغه زیاته کړه، چې د پاکستان امنیتي ځواکونه به د دغه هېواد د سولې او ټیکاو دوښمنانو ته غاښ ماتی ځواب ور کړي.
که څه هم اصف علي زرداري په خپلو خبرو کې د کوم هېواد نوم نه واخیست، خو د دغه هېواد چارواکي افغان طالبان د پاکستان ضد وسلوالو ته د پټنځو په ور کولو تورنوي.
د پاکستان پوځ تېره دوشنبه د پکتیکا پر برمل او د خوست پر سپېره ولسوالۍ بمبار سره ادعا وکړه چې د ټي ټي پي غړي یې په نښه کړي دي.
طالبانو د اسلام اباد د دې ادعا په ردولو سره وویل، چې په بمبار کې ولسي وګړي وژل شوي دي.
د طالبانو حکومت هم د پاکستان دغو بریدونو ته په ځواب کې د پکتیا له ډنډپټان سره پر ډیورنډ کرښه د پاکستاني ځواکونو پوستې په نښه کړې.
د طالبانو حکومت او ټي ټي پي د اسلام اباد دا ادعا ردوي چې د پاکستان پرضد له افغان خاورې ګټه اخلي او زیاتوي چې دا ډله په پاکستان کې تر خپل واک لاندې ځمکه لري او له هغه ځایه خپل بریدونه پلانوي.