د ايټاليا د لامپدوسا ټاپو ښاروال د پنجشنبې په ورځ (د وږي په ۲۳مه) وویل، په تېرو ۴۸ ساعتونو کې شاوخوا ۷ زره کډوال له شمالي افريقا په کښتيو کې دغه ټاپو ته رسېدلي دي.
فیلیپو د دې کډوالو د ښه راغلاست پر مهال ویلي، په دې ټاپو کې وضعیت «بحراني» شوی دی.
د ایټالیا په لامپدوسا ټاپو کې چارواکي وايي، په تېرو دوو ورځو کې له شپږ زرو زیاتو کډوالو له راتګ سره دغه ټاپو له «بحران» سره مخ شوی دی.
دغه چارواکي له اروپا او د ايټاليا له حکومته هم غوښتي، چې د دغو کسانو د مرستې او ملاټړ لپاره ژر تر ژره لاس په کار او د انتقال برخه کې یې اقدام وکړي.
په مدیترانې سمندرګي کې لامپدوسا ټاپو د تونس، مالټا او همدارنګه د ایټالیا د سسلي لوی ټاپو تر منخ موقعیت لري. دا بندر دهغو ډېرو پناه غوښتونکو لومړنی ځای دی، چې اروپایی اتحادیې ته د رسېدو په لټه کې دی.