په مراکش کې له خونړۍ زلزلې درې ورځې وروسته د مړو شمېر نېږدې دوه زره او ۵۰۰ کسانو ته رسېدلی او د وخت په تېرېدو سره له خاورو - خځلو څخه د ژوندي لاندې شویو کسانو د راویستلو هیله له منځه تللې ده.
رویټرز خبري اژانس د مړو شمېر 2,497 او د ټپیانو شمېر 2,476 ښودلې ده.
د هسپانیا، برتانیې او قطر څخه د ژغورنې ډلې زلزله ځپلو سیمو ته تللي، چې تر خاورو لاندې د بندو کسانو لټون وکړي.
د مراکش څخه د راپورونو له مخې؛ د دې زلزلې له امله د ویجاړولو اندازه خورا پراخه ده.
مراکش د جمعې په ورځ د ۶،۸ درجې زلزلې ولړزاوه؛ دا په تېرو شپږو لسیزو کې په دې هېواد کې تر ټولو خونړۍ زلزله ده.
بې کوره خلک په پرله پسې درېیمه شپه بې سرپناه پراته وو، او ډېری هغه کسان چې خپل کورونه یې له لاسه ورکړي په بهر کې پاتې شول.
یو شمېر هېوادونو له دې پېښې وروسته له مراکش سره د مرستې لپاره خپل چمتووالی اعلان کړی.