د هرات څخه ځايي سرچينو ویلي، چې د جمعه په ورځ سهار (د تلې ۱۱مه) د تېلو په یوه ټانک د هرات ښار د «۶۴ متره» په نوم سيمه کې اور اخيستی دی. افغانستان انټرنشنل ته رسېدلي انځورونه ښيي، چې د پېښې له ځایه لويې لمبې پورته کېږي.
ځايي سرچينې زياتوي چې لومړی د چاودنې غږ واورېدل شو او بيا پراخه اورلګېدنه رامنځته شوه.
تر اوسه اورلګېدنه نه ده مهار شوې او نه هم د چاودنې او اور لامل معلوم دی. همداراز،د مرګ ژوبلې او مالي زيانونو په اړه لا تر دې دمه معلومات نشته.
په هرات کې د طالبانو ځايي چارواکو تر اوسه د دې پېښې په اړه څه نه دي ويلي.