نن د (سپټمبر ۲۲مه) د موټرو د نه کارولو نړۍواله ورځ ده. د دغه ورځې د نمانځنې اصلي موخه د هوا ککړتیا کمښت او د بایسکل ځغلونې او پلي تګ کلتور دودول دي. خو له بل پلوه د افغانستان پلازمېنه د هغو ښارونو په کتار کې راځي، چې هوا یې ککړه ده او اوسېدونکي یې د موټرو له ګڼې ګوڼې شکایت کوي.
افغانستان یو له هغو هېوادونو دی، چې د اقلیمي بدلون له امله سخت ځپل شوی او د اقلیمي بدلون په برخه کې د پوهانو لهخوا ورته سپارښتنه کېږي چې باید د چاپېریال ساتنې په برخه کې احتیاطي تدابیر جدي ونیسي.
د ملګرو ملتونو د چاپېریال پروګرام (UNEP) بیا وايي، چې د موټرو نه کارول او یا یې کم کارول د خلکو د ژوند کیفیت ښه کوي او له هغې مهمه دا چې د اقلیمي بدلون پر وړاندې د مبارزې لپاره اغېزمنه لاره ده.
د موټرو نه کارولو نړۍواله ورځ (World Car-Free Day) د ۱۹۹۰کال په لومړیو کې په اروپا کې د چاپېریال ساتنې د بېلابېلو خوځښتونو له لوري د هوا د ککړتیا او د ټرافیکي ګڼې ګوڼې پر وړاندې د عامه پوهاوي د لوړولو په موخه ونومول شوه.
وروسته بیا د ملګرو ملتونو د چاپېریال پروګرام (UNEP) هم له دغه ورځې ملاتړ وکړ او له شاوخوا ۲۵ کالو راپهدېخوا هرکال دغه ورځ د نړۍ په بېلابېلو هېوادونو کې نمانځل کېږي.