د طالبانو د دفاع وزیر مولوي محمد یعقوب مجاهد وایي، دا مهال د کابل او اسلاماباد اړیکې ترینګلې دي او دی ترې ناخوښه دی. د نوموړي په خبره؛ د افغانستان او پاکستان ترمنځ د اړیکو خرابوالی د دواړو هېوادونو په زیان دی او په کار ده، چې په خپلو کې ښې اړیکې وپالي.
- نوموړي په دې اړه له بيبيسي سره په یوې مرکه کې ویلي:« موږ هیڅکله نه غواړو، چې له پاکستان سره مو اړیکې ترینګلې پاتې شي. د اړیکو ترینګلتیا نه د افغانستان او نه هم د پاکستان په ګټه بولو. زموږ کوښښ دا دی، چې په هره برخه کې ورسره ګوزاره ولرو او د همسایهتوب حقوق یو بل ته ورکړو؛ خو له بده مرغه په اوسنیو شرایطو کې حالات عادي نه دي او په دې اړه زه خوشحاله نه یم.»
- هغه تر دې وړاندې هم د خپلواکۍ ورځې په مناسبت جوړې شوې غونډې کې د ګاونډیو هېوادونو په اړه څرګندونې کړې وې. هغه ویلي و:« موږ د ګاونډيانو په اړه بد نیت نهلرو؛ خو له دوی هم همدا هیله لرو. موږ له ګاونډيو او نړۍ سره ښې اړیکې غواړو.» هغه زیاته کړې وه، چې نه د چا په کورنیو چارو کې لاس وهنه کوي او نه چاته اجازه ورکوي چې د دوی په کورنیو چارو کې لاس وهنه وکړي.
هغه په یادې مرکه کې د القاعدې ډلې سره د اړیکو په اړه د یوې پوښتنې په ځواب کې وویل:« پر افغانستان د امریکا تر یرغل وروسته له القاعدې ډلې سره اړیکې نهلرو.»
هغه دارنګه ویلي، چې اسلام یو منځلاری دین دی او که څوک پهکې د افراط او تفریط لور ته ځي؛ نو هرو مرو به خطا کېږي. نوموړي که څه هم په مستقم ډول چاته اشاره نه لرله؛ خو دا یې ویلي:« هغوی چې په واقعي معنا غواړي د اسلام له دین سره تګ وکړي؛ نو هغه به له افراط او تفریط څخه ډډه کوي.»