د امریکا د استازو جرګې له ۱۲ ډېرو ډیموکراټو غړو د ټرمپ ادارې ته یو لیک استولی، چې د دولت په توګه د فلسطین د رسمیت پېژندلو غوښتنه پکې شوې ده. اکسیوس د دوشنبې په ورځ خبر ورکړی، چې لږ تر لږه یو غړی غواړي په همدې تړاو یو رسمي پرېکړهلیک هم وړاندې کړي.
اکسیوس ویلي، چې دا غوښتنه د فلسطینیانو د حقونو، سیمې د ثبات او د دوهدولتي حل لارې د ملاتړ یوه هڅه ده.
دا خبر داسې مهال خپرېږي، چې د اسراییل او فلسطین ترمنځ تاوتریخوالی دوام لري او د فلسطینیانو د ځمکو د نیولو پر ضد مظاهرې هم روانې دي.
د جولای پر ۱۸مه، جنین ښار ته څېرمه، فلسطینیانو په رابه کلي کې د ځمکو د غصب پر ضد مظاهره وکړه، چې د اسراییلي امنیتي ځواکونو حضور هم پکې لیدل شوی و.
د رپوټونو له مخې، ښايي دا نوې هڅه د امریکا د بهرنۍ تګلارې په ځینو برخو کې بدلون راوستلو ته لاره هواره کړي، خو لا څرګنده نه ده چې سپینه ماڼۍ به په رسمي ډول د دې غوښتنې ملاتړ وکړي که نه.