د طالبانو د بهرنیو چارو وزیر د سې شنبې په ورځ د افغانستان لپاره د پولنډ له ځانګړي استازي سره د سیاسي او اقتصادي همکاریو او په اروپا په ځانګړې توګه پولنډ کې د افغان کډوالو د ستونزو په اړه خبرې اترې وکړې.
د ویټولډ سوبکوف سره په لیدنه کې امیر خان متقي د دواړو هېوادونو ترمنځ د اړیکو د پراختیا او د پولنډ د بهرنیو چارو وزارت سره د اړیکو د کچې د لوړولو غوښتنه وکړه.
د طالبانو د بهرنیو چارو وزارت نن سې شنبه د غبرګولي په ۱۳مه د یوې خبرپاڼې په خپرولو سره لیکلي چې امیر خان متقي د پولنډ له ځانګړي استازي سره لیدلي دی.
خبرپاڼه وايي، متقي له نړیوالې ټولنې سره د اړیکو پراخولو ټینګار کړی او وړاندیز یې کړی، چې پولنډي پانګوال په افغانستان کې په مختلفو سکتورونو کې پانګونه وکړي.
د طالبانو د بهرنیو چارو وزارت د ویټولډ سوبکوف په حواله راپور ورکړی، چې د پولنډ ځانګړي استازي، په داسې حال کې چې په افغانستان کې د پانګونې فرصتونو په سپړلو کې د خپل هیواد لیوالتیا څرګنده کړه، ټینګار وکړ چې دوی به په افغان کډوالو پورې اړوند مسایلو ته هم رسیدګي وکړي.
مخکې له دې، د افغانستان لپاره د ازبکستان له ځانګړي استازي سره په یوه لیدنه کې سوبکوف د افغانستان د وضعیت په اړه اندېښنه ښودلې وه.